कविता : एउटा प्रेतात्मा

शुन्य समयको दस गाजामा उभिएर
आफ्नो अस्तित्व खोज्दै छ
चौतारी ।
खोलो तार्दाको त्यो साथि
स्वार्थ पूर्ण भयो कुनै कामको छैन
अब त्यो चिसो लठ्ठी
बस्
नयाँ परिवेश, परिबन्द, स्वादले
गिजोलेको जीवनमा पुरानो एकलासे
त्यो साथि किन पो चाहियो र ?
अतित त पुरै पुरातनबादी न हो
'वाद'हरुको हूलमा धमिल्लिएको
ऐना पुछ्दै आफ्नो अनुहारको धुलो नदेख्ने
ईतिहासका छाप अमेट्य भए पनि
आज हिजोका छायाँलाई
आज ठानी मेट्न खोज्दै
अतितको चिनोलाई तगारो मानी
यता त्यता रुमल्लीरहेको,
भट्कीरहेको
एउटा प्रेतात्मा हामी सबै ।